Għażla ta' Poeżiji ta' Adrian Grima

 Naturalment, jekk tixtieq tużahom nitolbok tinfurmani.

Minn Rakkmu (2006)

Iċ-Ċimiterju ta' Arlington, Virginia

Il-Wasla Mhux Mistennija

Asefru ghal Poplu

Qamar?

Il-Golf Kellu Jkun

Distanzi

Il-Kriżi tal-Valuri

B'Idejna

Tqum ir-Rebbiegħa

L-Għatx tal-Liġi

Dit-Tagħbija Barranija [jaqra Ray Calleja]

Spazji Oħra [taqra Marcelle Teuma]

Ramallaħ (silta) [taqra Marcelle Teuma]

Dubrovnik [taqra Marcelle Teuma]

Minn It-Trumbettier (1999)

Illejla, Jekk Trid ...

Bexxqet il-Bieb

L-Imħabba Bħal Murtal

Meta Tkun Tħobb Ħafna

Meta Jitlaq Kulħadd

It-Trumbettier

Id-Dubju Fatali

Torturi

Ma Nistax Ninsieh

Aħna Li Nċafċfu Saqajna

Sensiela

Dil-Qawsalla

Illejla Skiet

Is-Sale Grandjuż

It-Traġedja ta' l-Iljunfant Li Ried Jidħol f'Gaġġa ta' l-Għasafar

Il-Ġarr tal-Piżijiet
 

Poeżiji Oħra

Don't George, Don't Worry

Is-Santi Padri tal-Poeżija

Il-Kriżi tal-Valuri
Li Peng fiż-żokkra tal-Kattoliċiżmu

Għażiż Sur Priministru,
dawk l-elf issallbu lkoll.
U magħhom il-ħalliel it-tajjeb
u l-ħażin wkoll.
L-ommijiet bkew quddiem it-tankijiet
u l-forka u l-ħabsijiet,
u l-ħbieb il-kbar ta’ wliedhom
baqgħu hemm biex isabbruhom.

Kollox l-istess, Sur Priministru
Malti,
anki t-tradiment ta’ qabel
u ta’ wara.
Għal ħafna soldi kulħadd jaqa’,
anki kattol’ku ferventi,
anki jien, konvint, kredenti.
Kulħadd jaqa’, Sur Priministru onest,
imma mhux kulħadd jammetti;
mhux kulħadd jirremetti
meta jiekol il-kirxa
u jħokk íismu ma’ Erodi.
Tassew, Sur Priministru safi,
għandna kriżi ta’ valuri
u purċissjoni wara d-Duluri
mimlija ipokriti.
Tassew.

Ftakar fija dejjem,
Adrian Grima.
14.10.95
 

B'Idejna

Waqt l-innu Malti

ma nafux x'se naqbdu nagħmlu b'idejna.

Idejna jistennew mumenti bħal dawn bil-ħerqa,

għax niftakru fihom kif inhuma,

mhux bħala strumenti f'idejna.

L-innu Malti, niskopru kull darba,

jindaqq biex ifakkarna li aħna dak li aħna,

li nilbsu dil-ġilda lewn ix-xemx

u dan il-moħħ lewn ix-xagħri.

Imbagħad meta nħarsu lejn xulxin

nintebħu x'għandna nagħmlu.

Mhux dejjem nagħmlu hekk,

skond l-udjenza.

U nħossni qisni spalliera

li waħedha baqgħet tistenna li titgħatta;

ktieb li nqalgħulu l-paġni;

fidil wara stering ta' karozza f'salib it-toroq

li ma tridx tistartja;

poplu li qed jistenna wara l-bieb ta' uffiċċjal pubbliku

biex isir nazzjon,

mingħajr ma jemmen fil-kredenzjali tiegħu stess,

jew fl-utilità.

Waqt l-innu nazzjonali nilbsu l-ġlekk ta' l-okkażjoni,

l-iktar ilbies fjakk għax jiekol mid-diskorsi

u jixrob il-grokkijiet tal-pożi.

Darb'oħra forsi npoġġihom quddiem għajnejja

u nsodd widnejja, f'salt.

Asefru għal Poplu

lil ħabibi Samir, Berberu Alġerin, waqt gwerra ċivili

F’għajnejh hemm kontinent jissara u jirbaħ,

kulturi jistennew bla kwiet il-waqt,

muntanji siekta jitħejjew għall-baħar,

memorji ‘l hawn u ‘l hemm bħal dwal weqfin.

Bagħtulu nota d-dar u avżawh… inkella…

minn dak il-ħin sar klandestin taż-żmien;

u kulfejn mar

kien bogħod mid-dar

li ma ridhiex,

u riedha.

F’għajnejh hemm konvinzjoni ġdida mwerwra

hemm dell li fih jistkenn ħalliel armat;

reġistru wċuħ imwiegħra, ‘kkanċellati,

tissara kontra xemx li trid tnessih.

Ío fih hemm belt mixgħula, tfassal, tbaqbaq,

li niżlu fuqh’ aljeni mitfijin;

u kulma ried

ġo nofs das-swied

kien biss li jmur,

u telaq.

U fil-fixla

ħalla nofs bniedem warajh għal dejjem;

miegħu kaxkar biss it-tama

li jiġbor imqar ftit qofol,

ftit biċċiet.

Asefru, bil-Berberu Alġerin, tfisser “poeżija” u titlissen “asfru”

Qamar?

Samwel, wara sena u nofs

Għax int bi nhar bilfors trid tara l-qamar;

u jien, għax dmiri li nissodisfak,

noffrilek xemx li tfiġġ minn wara sħaba,

imm’ int ma tridx ‘il “din”, int trid ‘il “dak”.

Għalhekk, minkejja n-nhar, tistenna l-qamar,

u jien ġo fija naf li mhux se jfiġġ;

noffrilek nostalġija, qamar kwinta,

imm’ inti tridu issa stess, pariġġ.

Għax int mhux biss bil-lejl trid taħfen qamar,

u jien ma nafx kif se nikkuntentak,

“hemm ġranet mod u ġranet mod”, infiehmek,

imm’int ma tridx diskors, int trid ‘il “dak”.

Is-Santi Padri tal-Poeżija*

Isejħulhom is-Santi Padri.

Għalihom jeżisti l-vatikan tagħhom biss,

u kull interpretazzjoni titbiegħed wisq.

Jemmnu f'alla wieħed, naturalment,

imdawwar bi ftit appostli:

ma jkollokx alla ieħor għajri.

Min ma jtennix il-patroloġija tagħhom

ma jeżistix,

jew ma jistħoqqlux jeżisti,

u l-globalizzazzjoni ma tiswiex,

jew saħansitra ma teżistix,

jekk ma tigglobalizzax lilhom;

il-kelma tagħhom tibqa' –

ta' l-oħrajn ma tibdiex.

Fejn ma jasalx leħenhom irpużat

tasal l-id moħbija tan-nom de plume;

fejn ma jasalx in-nom de plume,

jaslu l-appostli; jew bil-kontra.

In-nifs li jonfħu, nifs universali;

l-iskossi respiratorji ta' l-oħrajn,

marradija u neqsin mit-taħriġ u d-dekor

tal-pulmuni maturi.

Max-xandir u ma' xulxin

iżżewġu żwieġ ta' serħan u konvenjenza:

Ix-xandir jitkabbar bihom,

huma jitkabbru bix-xandir,

u bejniethom jitkabbru b'xulxin.

U meta jmaqdru wieħed lill-ieħor, fil-moħbi,

jikkapparraw għal dejjem kull possibilità ta' tmaqdir.

Id-dinja ta' l-allat, jew tas-Santi Padri,

mhix ir-roqgħa tal-bnedmin.

U dawn il-ftit skossi poetiċi li qrajt

la għandhom il-barka ta' l-allat

u lanqas mhuma mnebbħin.

*Titlu mnebbaħ minn kumment profan ta' Sergio Grech